Powèm Nasyonal kaye No2 a vini ak senk nouvo powèt tout plim tout plimay. Nou pote senk nouvo souf k ap deboutonnen anba ti vant leta, konte grenn siwèl nan syèl jouk sosyete n rejwenn gou lavi, libète ak lanmou. Kaye sila pibliye pou ranfòse ak fè plis pwomosyon pou Pwezi ak Kilti lakay, se yon kokennchenn kanpay sansibilizasyon ak vilgarizasyon sou lang ak Literati Kreyòl ki regwoupe divès Powèt Ayisyen toupatou sou planèt la. Pa janm bliye inisyativ sa se powèt Wilkens Scott Fifi ak Godson Moulite jounalis kiltirèl ansanm ak lòt kolaboratè tankou Powèt Philippeson Juste (Mapou lib e libè), Dawinson Saint Charles aka Malab'art (Grafis) ak Tètpwav Solèy (Atis Pent http://www.tetpwav.com) ki pote l pou ou.
Powèm Nasyonal Sosyal
1
Kanmarad
M reve dlo / M reve van
M reve syèl ak tè a pouri Nan yon sèkèy madoulè nan lari pòdpè
Simetyè tchoupe sou mò Mò tchoupe Bawon Kanmarad M reve pòdpè nan yon dans makwali
Jan Wilkens Scott Fifi te di a
Se fanmi mò k kriye / se pa mò
Kanmarad
Zo rèv la pa bon pou fè bouton.
Zambo Boukan Zhèd, Pòdpè / Ayiti
2
Dyela, Jezi Pa La
Dyela, Tout ti fi se sonj bòlèt Leta toujou bliye Se sa k fè se pa ni nan dòmi
Li kontre kare ak rèv ou… Ou pral gen pou w temwen non w tranzisyone W ap pote tout non
Anvan menm ou ta rive pouse tete.
Menm lè sa a Dyela, Pa kite yo konfonn ou pou jou W ap gen pou w fanm nan.
Si depi jodi a ou pa ka danse ak van an Ti fi ou ye a p ap janm vid limanite bezwen ranpli a.
Lè w kanpe ou dwe konnen
Te gen moun Ki te pote ase kouraj pou w viv lib,
Lè w kanpe pou flè te pouse anba pye w,
Se pa mouch sou tout kadav ba
Dèlma
Pou w kite ap vante w san soutyen.
M ap di w sa a
Pèrèz ou yo se yon Sonata
Ou se yon solis
Sou wout Nasyonal bay peyaj Pou andire koneksyon initil ant de ekstremite, Pye w dwe lejè nan Pòtoprens !
Leve !
O pitit fi m leve!
Angaje yo ak fòs pou esans ou
Yo pa ka kenbe nan kaj
Ninia Bien Aimé (Tipowèt)/Miyami, Florida
3
M vomi eta Leta
Kite pwezi a vide pou l ret vid
Pou kè rim yo pa plen
Leta pay / Leta vaykevay
Se lannuit pou n vannen sa
Leta enferyè
Santiman grapyay
Rezilta grabday
Leta pwòp kouwè siray Mezanmi, Men boul mikwòb la Nan malpwòp li
Byen mal okipe
Pòtre pwason gate sou waf
Malherbe JOSEPH (Relem Moun)/Okap, Ayiti
4
Pwason davril Minui 77 Revèy katedral resi afiche lè endig Premye mirak sendenden
Premye novanm pran nan pwason davril 8 jiyè
Pawòl la plen dyòl
Gran tit nouvèl la pèdi mezirèt Avan katrè Lavant jounalis antre jounal
Nanpwen jenou kwochi Nan
lapriyè kapital
Trap de Amèn kouri 9 milimèt Pak an pak tan tchak tchak letènite Pwentiye, tirè
Leta ak ranpli vid simityè Jilèt bouyi, ministè boukannen Lari a konn doulè règ
Toum tak, toum tak Egui desann mòn, minis albatwòs Pèp pè Leta pèpè
Tap glòt Oseyan vale revolisyon pasifik
Tout ri tout rèl
Tout ri tout riyèl melanje
Lari a pa pou kò l
Chaje mò atè
Egui ap monte mòn
Dlo je ap neye kè Zetwal yo dòmi nan pye nyaj
Nan klere tou pou antere plenn
Solèy tonbe l pa leve
Youn pa youn
Tout pwovens Jwenn tikal kapital Batistè Pòtoprens pa t janm fèt sou non l.
Ruthza PAUL, Leyogàn / Ayiti
5
Sa lougawou bay chen kenbe
pou li
Devan pòt simityè
Fènwa pwès gen tranche
Nan je Bawon lari a fè kansè Tout pòt kay sou gran ri tounen lanvè Lannwit ap jape / L anvi bwè San
Lari a lou kou pwa senkant
Nan ren de chen ki kole
K ap chare zombi pye atè
Se ak zo mò yo bat galipòt
Pilonnen, krabinnen, Kat pye sou tonb Blip!
Yves Romel Toussaint, Ench / Ayiti
Powèm Nasyonal Santimantal
1 Chak ti koze nou pale
Se de dwèt nou kwaze inosamman Se yon kwa nou fè sou kè n
Sou kè Sen Monfò
Ak sou kè Papa Bondye
Jouk pwomès nou jwenn plis jèvrin Èske w konnen chak nou souri Se yon branch lavi nou kenbe ansanm Se yon lòsyè lanmou pyès zouti pa ka mezire
Ooo solèy
Ooo labrenn dimaten
Lakansyèl la kanpe sou pye l
L ap mouri je ban mwen
Lè nou souri
Se de dwèt nou / se san n ki kwaze Inosamman jouk pwomès nou Jwenn plis jèvrin
Chak nou kontre Chak ti koze nou pale
Se yon long kwa toudennpyès
Nou fè sou kè n
Sou kè Sen Monfò
Ak sou kè Papa Bondye
Zambo Boukan Zhèd, Pòdpè / Ayiti
2
Se nan renmen w
Mwen konnen mil koulè lakansyèl; Farinen souvni nou nan do kostim diktati.
Men longè kòl nan kou yo
Yon kosyon transandans,
Kote tout senfoni balonnen kwoke
Fòk nou ta gen yon koulè ki rete n.
Kè m lontan pèdi fil kab li Nan klandesten, Lari a se pou Leta li ye.
Demi souf ki rete m nan
Se pou m pote w sou do m
Pou m pa temwen kadav ou Kouwè bwat jina devan palè.
M a kriye si gen tan!
Ninia Bien Aimé (Tipowèt)/Miyami, Florida
3
Diva…
Nan ban dèyè w
M se yon lyon
Sou do douvan w
M se yon mouton
K ap manje vyann pou zèb Rèl mwen chire / pete nan sezon karès ou Diva…Diva… Diva
Se ou k kat kara ekla baraka lasata manman penmba Vire m non,
Tounen m non,
Nan ban dèyè w
Ou se yon matla bonbe kare
Pap la deklare douvan w katolik Ou Lepèp konnen w se Diva
Mwen m konnen
Ou se chaplè konfesyon m
Lè granmoun pa la
Ak balèn mwen nan men m M ap resite jekwazandye / Pè toupuisan
Kondui nevèn ou nan senk ne / venn / ra senti
Ansanm pou n fè kominyon
Nan kalis / riyèl juisans lavi.
Malherbe JOSEPH (Relem Moun) Okap / Ayiti
4
Kò pèdi
Aswè a m ap fè vèy ou ak lalin nan Zetwal ap koute dèyè nyaj
Lwanj renmen w
M ap pwomennen sou tèt dyòl
M pran nouvèl
Galata gate santiman
M ap flannen ak Batman kè m Nan pla men m pou m depoze nan pye w
Ou pa bezwen pèdi tan
Nan veye jan w mache
Ou twòp pou tè
Pa lontan n ap renmen kò pèdi
Aswè a ankò
Imaj ou plen tèt mwen
M boukante bonnanj mwen Ak sant swe w,kò m boule rapyetè Batman kè m pòtrè dou m gaz
Eko l fè madebat nan fant janm
mwen Kè m twò piti pou m renmen w Kite m renmen w ak tout kò m! Ruthza PAUL, Leyogàn / Ayiti
5
Rèv mwen tatouwe nan souf ou Kèm pandye / m ap toufe san plenyen Chak kout Je ou banm S on kout kòf fizi k grafonyen bò kèm
Fè m karese nanm ou ak bouch mwen Cheri Fè m danse / pyafe nan siwo kann ou Jouk pye m glise nan fant kò w
Fè m naje / ale vini nan pla men w
Fè m woule desann / fè kè m fann tou kanpe Pou san m tounen rigòl dlo wouze jaden w Fè m damou w jouk zetwal nan tèt mwen Fè dappiyanp devan pòt ou
Rèv mwen se yon kout rèl m fè w cheri Avan jou kaye san, nyaj yo chire jis nan do
Chak kote m pase lari a gen sant fanm Lari a gen sant kò w tatouwe rèv mwen
Tou kòche !
Yves Romel Toussaint, Ench / Ayiti