10 sou 10 rekòt kafe pou KLASS

Se toujou konsa nan mache mizikal ayisyen an, gwoup ki domine li a toujou gen anpil atant lè pou l sòti yon pwodui. Se nan sans sa anpil fanatik ak meloman ap tann fòmasyon mizikal KLASS k ap gen pou soti yon mizik ki fè sentèz dizan karyè yo. Mizik sa a ap rele 10 sou 10.

Mizisyen gwoup la ap travay rèdchèch pou delivre yon pwodui santi bon. Yon pwodui ki reponn ak egzijans moman an, ki se fete 10 lane yo. Sa vle di, se va yon mizik fèt, selebrasyon, yon mizik pou moun danse, pran plezi yo annatandan albòm nan sòti. Jan Mayestwo Richie di li a : « Fèt la se pou tout lane a. Se pa pou yon jou, yon sware. » Sa ki fè n konprann tout moun alawonnbadè ap gen chans pou yo koupe gato dis (10) lane pa yo. Keseswa moun nan te  nan peyi Chili, Lafrans, Ayiti, Repiblik Dominikèn, Matinik, Gwadloup, tout vil nan peyi Etazini yo, Doubay elatriye.

Depi dis (10) lane gwoup sila ap fè moun danse malgre sitiyasyon soyo-politik peyi a ak sanitè monn lan. Nan diskografi yo ak twa albòm Fè l vini avan, Fè l ak tout kè w ak Ret nan liy ou, nou jwenn mizik ki trete lanmou, peyi, filozofi sou lavi, plezi, elatriye ak ki trennen plizyè kategori estetik tankou nostalji, lajwa… oubyen tou chak mizik kapab sisite yon sansasyon ak santiman ki diferan lakay chak moun k ap kontanple li.  Nou kapab site kèk  tit majè gwoup la, tankou : Fè l vini avan, Priyorite, Nou se Ayisyen, You don’t want me, Mizik sa a, Anmwe sekou, Ranje chita w, Lajan sere, Pitit deyò, Klike sou li, Blakawout, Ret nan liy ou, M ap marye, Pale pou tèt ou, pou n site sa yo sèlman.