Atelye kreyasyon literè Jacques Stephen Alexis

Atelye kreyasyon literè Jacques Stephen Alexis pran fòm yon founo, kote mo evapore an vapè tanbouye, mele ak powem ekri an kreyòl ki soti potoprens, vin fann fwontyè lang ak lespri pou enskri nan kolòn Le National. Se la nanchon an, je kreyòl byen louvri, va dekouvri pwòp reyalite l nan ekriti vivan.

Godson MOULITE

Ribrik sila se yon zouti pou devlopman lang ak Literati nou an, ribrik sa pibliye pou jayi lanmou ak byennèt toupatou sou teritwa nasyonal la ak lòt bò dlo.

AK  Atelye kreyasyon literè Jacques Stephen Alexis kise yon inisyativ  jounalis-powèt Godson Moulite,

POWÈM POU LIBERE AYITI

Vinn dim leta

Kote lanmou pa konte

Vinn twoke manti nan lestik nou

Fè n bliye dlo je n anba pay

Kote lanp tounen twalet devan palè

 

M voye 3 orevwa anba lavil

Pil fatra tounen toupi

Mwen kouri san pran souf

 

Dikte zetwal yo nan lari kote lanmò se rèl

Tanzantan se biw biw

Vinn kote m , lanmou

vinn kote m , tristès

 

Vinn dim kote w rete

Pwofite danse nan Souf mo m yo

 

Vinn dim tout soufrans ki genyen nan latrinn Kay vwazin

Pran m an janm de bwa

Vinn kotem

/ Rakonte m / istwa lanmò

Vinn dim ki koulè potoprens

Normil Jean-Pierre

Pòtoprens  /  Ayiti

 

2-

Tikal pa Tikal vil la tounen fènwa

Kote tout twal san / tounen rat

Kote figi lari a tounen san

 

Vinn kotem poum diw kote m kase dan Powèm Mwen an

fè m woule atè

kote souf Mwen se rigòl dlo poud

Vinn kotem kote syèl la mawonen ak zandolit

riyèl yo ap fèm grimas

 

vinn dim soufrans ou

Vinn karese m leta anba lavil

Vinn jwe nan jwet Mwen

Rèv Mwen yo konn reve tou

Leta pran 3 kout wòch anba dra

Vinn dim Souf Mwen yo

Kote prizon mawonen ak sann dife

 

Patrick Giovanni

Pòtoprens/ AYITI

3-

Tanzantan Map soufle dwèt mwen poum niche rèl potoprens

Machwèl chavire tanmen lawouze

Lavil chè

Tankou kwa bousal

kote tout koulè tounen lespas

Kotem kouche pou m neye nan fatra

Vizite labou kay tout konken sou bwat chèn

Kote lavi m san avni

 

Pi bon Jou  se lè Biden

Ekri nan tout mi bouklinn

Kalonen ri m yo anba mache salomon

Keyi peyi m tèt anba

 

Vire tounen se san potoprens

Vire tounen se rèl

Kote espwa tounen mantò

Gustave Michel

Kwadèboukè  / Ayiti

 

4-

Chouk li Jou map voye kòm

Chante o leta kokobe

Chire mizè nan lespwa m

Pataje souf mwen/   nan simityè potoprens

Je fèmen map bourike lavni m

Triye bonèm nan padon Desalinn

 

Tonè krazem

Map di leta lap kwaze ak bondye

Libere m souple poum pa fou

Foli m tounen pidetwal

 

Kote soufrans Mwen pran blayi mizè

Nou mele

Peyi a fini

Gason potoprens

 

Nou mele

Ebyen sa te fini  trè mal

Leta banm pwazon

Dominique Jean

Pòtoprens / Ayiti

 

5-

EKRITI MAKOUT

Potoprens

 

Ou se Yon bel fatra kap bat poul sove nan men chinwa yo

Kote etikèt yo pa reyèl

Kote lanmò pa lò

 

Vil natal palè 12 janvye a

Men defiw

 

Mwen pote pou ou mizèm ak Literati nan pòch

Mwen priye/ priye/ jouk mayi mi

Fè masak ak dlo je m

 

Batman souf mwen se pwazon

Map wonfle poukont mwen

Pentire m nan do

Ak souf Mwen

 

Drapo m pete rèl

Lapolis vizye nan kè

 

Yon lo manti lote sou non w / potoprens

Leta kontan

Leta pipi lajan

Leta se yon fatra

​

E sim danse toutouni

Kolem ak krache

 

Deschamps Paul ( Polo)

Pòtoprens / Ayiti

 

POWÈM SANTIMANTAL

1-

Mwen renmen w cheri tankou dòmi m

Tankou yon plat soufrans ki pat sou kafou

Tankou lanmò krèk koko

Mwen renmen cheri tankou dlo je m

Tankou tout filozofim sou papye

 

Ou danse tankou tout minwi lèm avèw anba dra

Ou pete rel tankou zansèt nou yo

 

Mwen anviw aswè a

 

Doum gaz paladann

Nap kache nan syèl

Nap dous pawòl nou nan kè

Inonde soufrans nou ak richès

 

Nap danse san remò

Nap tire fistibal

Nap demwazel lanmou nou

 

Cheri vinn kotem

Vinn danse avèm

Vinn wanamèt mwen

Normil Jean-Pierre

Pòtoprens / Ayiti

 

2-

Syèl la toutouni

Lap danse nan kanaval

 tire fistibal nan kèw

 vinn kache dèyèm

 

Vinn antrave m ak pawòl dlo dous

solèy laviw klere sou Mwen/ de pyem chavire

Timoun kaka je pa linèt

Pa berem banm jouman poum diw Mamou

Vinn antrave m ak laloz

Kitem pran elan

 

Tout lidem dim kèw se myèl

Toupiti Map danse poum tete

jouk li Jou/ map danse

 

Vinn dim Manou

Kitem vini

Kitem tranble

Patrick Giovanni

Pòtoprens / Ayiti

 

3-

VIRE TOUNEN

Kitem pran manm

Pa madichonen m

Kitem vinn souse w

Louvri jew sou Mwen dim vinn goute

fetay kay ou a ki yon ti lezanj kap danse

 

lè kò w tounen ekla

Vire sou de pye m

Vire m tounen m se lalinn map tann

 

Dlo dous

Kote sous kòw koule  ?

 

Vire cheri

Banm akasanw

glise m desann nan jup ou

Gustave Michel

Kwadèboukè / AYITI

 

4-

TOUT LIDEM DIM

Nan fon kèm ou se limyè

Klere jou m jouke m nan dans

 

Ou se rèl potoprens

Ou se bel melodi m

Monte bwa pou m keyiw sanw poko mi

 

Kite tristès ale

Makonen m ak pidetwal

Gadem tanpri

Kitem repozem sou souf ou

Gadem kap vini ak zetwal yo pou ou

Dominique Jean

Pòtoprens / Ayiti

 

5-

SAN OU

Jou sa a se wòb ou poum lave

Konte mizèm pa degouden

Separe m ak twa . Youn pou youn/ Youn pou kèw

Kòw se lò

Botew se pidetwal

 

Kote soufrans nou se rèl

Nan fènwa se nou de a

Nan souf  nou zetwal yo kache

Deschamps Paul ( polo)

Pòtoprens / Ayiti

 

Prezantansyon

 Godson MOULITE

Madi 11 mas 2025

 

KOREKSYON TÈKS

Marcellus Jean

Dieudonné Riché

INISYATIV

Deschamps Paul

Godson MOULITE

 

POWÈT PIBLIYE

Manb atelye kreyasyon literè Jacques Stephen Alexis