Sèt kout souf pou salye «Bout Souf»

Sèt powèt majè, majòjon,  sèt pi bèl vwa jèn jenerasyon an, mete talan yo ansanm pou salye premye rekèy pwezi Kreyòl Bout Souf, yon kreyasyon powèt Philippeson Juste, ke yo rele Mapou LibeLibè pote pou nou. Rekèy sa a se pa sèlman yon liv; li se yon vwayaj powetik ki fè nou antre nan yon linivè kote refleksyon filozofik, imaj fòlklorik, ak enèji lavi melanje tankou yon dans.

Bout Souf se yon bèl pyès nan patrimwàn literè Ayisyen an. Li charye mesaj lavi, lanati, ak esperans,  li sèvi kòm yon pon ant modènite ak rasin kiltirèl nou yo. Powèt yo, ak fòs mo yo, ofri yon omaj espesyal nan fòm sèt kout souf powetik ki rann onè rekèy sa:

Pwezi a bout nan souf powèt yo

Souf nou kreye vi sou papye blan

Imaj yon powèm boyemyen / jitan

Grenn pwomennen / pye blanch

Bout souf se rèl tout souf kout

Tout je k bande ak bandi

Grenn lay k soulaje jansiv dan di

Avan souf nou bout

Bout souf nou vivan nan de bout

Yon espwa anplis nan wonn lakontantman

Imajri powetik modèn mèveye

 

Wilkens Scott Fifi – Knoxville, Tennessee, USA

 

Yon dividal lanmou

Makònnen ak souf vi

Powèm nan plen men

Layite tout kò l nan de bò lakontantman

Katedral pa katedral

Sou tèt li l kanpe / Pou l danse

Tchovi yo swaf

Yon festival kat chimen

Bout souf pote vi ak ekla ri

Nan tout dimansyon linivè

Bout souf marande kè ak kè

Kò ak kò

Powèm lan debake ak tout mounite l

 

Stephanie Boursiquot – Pòtopren, Ayiti

 

Pa kite timoun yo jwe

nan vwa bondje mezanmi

pa kite yo trase marèl ak pikan kwenna

sou vizaj tan an tanpri

 

Gen souf ki pa fin souf isi a

Gen souf k ap trennen nan pye

Tyovi ki poko ka defini lavi ak je

Gen yon souf ki sevre tèt li

Menm avan je n kase lezo

 

Jis pou m pa kontrarye inosans powèm lan

M p ap respire anndan l

Souf mwen trivyal

Souf mwen mabyal

 

Bout an bout

Souf nou ap kalewès

Nan rès jounen grizonnen

Sekrè lannuit s on bann souf depatcha

K ap vwayaje nan je lanmè

Pa gen vag ki pa konn doulè

Yon kò ki pa ka kenbe pwòp tèt li

 

Nan filozofi lèzòm

Tout souf rabi sou pye

Se sou klou gagit bout ki rete yo ap mache

 

Styven Mangurat – Okap, Ayiti

 

Vire voye

Vannen triye

Bò isit nou s on bann pay

Van an sere pou pita

Lè MAPOU pèdi branch

Lavi etènèl se foli tout vèditè

San chante kantamwa fòmil sa se koze sa n pa wè ak powèm yo

Venteyen mèch k ap gagari lwil maskreti

nan chodyè twa pye

 

Zo

An n pa travèse lizyè pou n pa deranje lòd linivè

Sèl sa k pa n s on ti BOUT SOUF

An n pwofite l anvan syèl konn gou swe latè...

 

Gregphile Gregphile – Kafou, Ayiti

 

Yon lodè kafe san melanj

Ap layite kò l nan jipon kat eleman

Kite m pran souf

Kite m plonje nan nawè w tout longè

Manvi wè nanm mwen k ap navige

Lavi kap rele koukouwouj

Chalbari dèyè solèy kap leve

Bout jouk nan ginen

Nan yon vwayaj lwenten

San pran souf

Bout souf pote kwa l

Li taye zèb atè

Pou wè si la boutonfen

Nan lonbraj pè letènèl

Bout souf

Se sèl kri vèditè konnen

Ki fè yo bliye lamizè

Kap fè yo trennen kou vètè

Bout souf se chay sou tèt

Kè lejè

 

Valancia Bolivard – Okay, Ayiti

 

Valè powèm lan bese

Vil la pran nan mal makak

Jou yo pote koulè sann

Silwèt pousyè ak lodè kadav

 

Souf nou kout

Nap kouri lontan

San poze

San respire

 

Nou pè syèl

Latè n twò piti pou yo

 

Kechna Septama – Delmas, Ayiti

 

Paske limyè mare fache avè m

Mwen tonbe nan kòde tenèb

 

Chak koukouy klere m nan fènwè

Yon lonbray frape m gran jounen

 

M aprann langaj solèy la

Pou pawòl mwen briye lannwit

 

Mèsi mèt douvanjou

Mèsi mèt savann

Mèsi mèt letan

Mèsi mèt lawouze

Mèsi mèt Bout Souf

 

Depi lè van an pran kase zèl

Cheni ravin pè vin papiyon

 

Douvanjou tonbe tankou loray

Zobop pete kòken ak mèt kafou

 

Y ap tann pèlen men pa gen tèt

Lari a rete pou pèchò ak zagoudi

 

Ti Nèg – Philadelphia, Pennsylvania, USA

 

Se avèk gwo rekonesans nou salye Bout souf, yon espas kote lavi, mo, ak enspirasyon marande pou fòme yon chimen nan literati nou. Bout Souf se pa sèlman yon rekèy, li se yon rèl vi, yon souf vivan nan lespri tout moun.

 

Wilkens Scott Fifi