Premye tèz doktora ekri an kreyòl ayisyen : Yon revolisyon akademik ki afime granmounite lang pèp ayisyen an

Ekritè : Kenny Thelusma; Relektè-Korektè : Endara Elmano Joseph

Mizankontèks

Pou premye fwa nan listwa, yon tèz doktora konplè ekri e soutni an kreyòl ayisyen, epi resevwa mansyon trè byen, nan domèn tradiktoloji. 30 novanm 2025, se yon jou istoririk nan listwa akademik pèp ayisyen an. Nan yon vizyo konferans sou Zoom ki te rasanble plis pase 50 moun (entèlektyèl, akademisyen ak ansyen ofisyèl leta), Doktè Job Silvert fè yon ekspoze doktoral byen solid ki dire 26 minit an kreyòl ayisyen pou defann tèz doktora li sou pratik tradiksyon, yon premye gran siksè nan domèn tradiktoloji kreyòl.