Woman « Sans pou trase lanmou san enstriman», se youn pami mèvèy Malaba Pitit Plim reyalize sou chimen literati

       Se pa san rezon mwen toujou di : yon atis, yon ekriven se yon zwazo volaj ki bat zèl li tanzantan pou tout moun jwenn plim dore.

             Mwen dekouvri Malaba Pitit Plim sou chimen literè ak yon langaj powetik ki gen nanm. Depi sou premye tèks li mwen li ; mwen di nenpòt moun eklere ki tonbe sou zèv jèn ekriven sa a ekri, l ap wè li pa anfas krizokal, men pito bon lò. Se sa noumenm grandèt nou bezwen kay anpil jèn k ap ekri pou yo vini ak yon ekriti ki pa poul fatige sou chaj. Pwezi Malaba gen pawòl fò, pwezi angaje, pawòl sewòm pou remonte peyi nou ki malad kouche depi lontan anba frap tchoul dirijan enperyalis. Ekriti Malaba se yon richès li mete adispozisyon tout moun ki gen gou apresye bon bagay. Chak sa li pibliye, nou santi tribilasyon peyi a, soufrans pèp ayisyen an. Avèk Sans pou trase lanmou san enstriman jewometri, woman Malaba Pitit Plim lan, nou pral gen chans li, n ap kontan jui teknik li itilize pou li ekri l. Nou pral jwenn powèt la nan yon lòt dimansyon.

                   Kisa ki gen nan djakout Sans pou trase lanmou san enstriman jewometri, ekriven Malaba akouche ban nou ?