Akademisyèn Marie-Jeanne Léo Louis Charles fè vwal pou peyi san chapo

Akademi Kreyòl Ayisyen (AKA) ap anonse ak anpil lapenn lanmò Akademisyèn Marie-Jeanne Léo  Louis Charles janbe apre li te fin goumen ak yon maladi ki finalman pote li ale 29 jen 2023, nan vil Boston (Etazini). Anvan li vin Akademisyèn, Marie-Jeanne Léo Louis Charles te pase yon bon pati nan vi li  ap travay nan fè pwomosyon lang kreyòl ayisyen an, sitou nan domèn edikasyon. Li patisipe nan  montre moun li ak ekri kreyòl epi pote kontribisyon li nan konsepsyon materyèl didaktik ak pedagojik.

Akademisyèn, Marie-Jeanne Léo Louis Charles  gen yon fòmasyon inivèsitè nan lèt klasik ak nan òganizasyon ak jesyon pwojè. Vis Dwayen nan Faculté des Lettres et des Sciences Humaines-FLESH (UNDH), se dènye pos li te okipe. Akademisyèn nan fèt Kanperen (Depatman Sid, Ayiti) 31 janvye 1964. Apre plis pase trant (30) lane l ap travay nan domèn edikasyon, li te antre nan Akademi Kreyòl Ayisyen nan dat 30 jen  2022. Se Inivèsite Leta Ayiti ki te pwopoze kandidati li pou li vin manm enstitisyon an. Malgre li te nouvo, li te gen yon patisipasyon aktif nan divès aktivite Akademi an.

AKA pwofite pou li rapòte yon lòsyè nan pawòl Marie-Jeanne Léo LOUIS-CHARLES lan nan  moman li te poze kandidati li pou li te vin Akademisyèn: «Se tout rèv mwen pou ede flanbo a  limen pi lwen paske konprann yon lang, eksprime lide w ladan, etidye fonsyònman l, se tout  travay sa yo kreyasyon ak aksyon Akademi Kreyòl Ayisyen an (AKA) dwe pote. Alòs, etid sou sistèm kominikasyon ki pèmèt nou eksprime lide nou pi byen dwe fè wout li. Regilarize ekriti  lang kreyòl la selon nòm lengwistik yo dwe pote fwi. Tout sa enpòtan pou evolisyon lang kreyòl la».Akademi Kreyòl Ayisyen (AKA) swete fanmi, zanmi, kòlèg ak etidiyan Akademisyèn Marie- Jeanne Léo Louis Charles  yo kondoleyans, pandan l ap ankouraje tout moun pou yo kontinye rapousuiv bèl travay Akademisyèn nan te kòmanse.