Vle n pa vle, fòk l ale

Depi aprè diktatè Divalye kite peyi a pou l ale an egzil nan peyi la Frans, se toujou men m chanson an.  Lè se pa aba, se voye l ale. Men ale ki kote? Ale pou al kanpe lwoin. Trè lwen. Men m two lwoin. Pou ki sa li oblije ale? Men pou ki sa depi aprè fevriye 1986, se nan sa ke n pi fò? Voye l ale pou n mete tèt nou ak ti gwoup zanmi nou nan plas li. 

Nou tèlman fò nan sa, pou n voye yon prezidan eli ale, nou bliye zafè konstitisyon. Nou sòti ladan l nèt al kole. Li pa enpòtan nan moman an.  Se voye ale. Aprè sa, pou n k ab retounen nan konstitisyon, nou ale nan Kou de Kasasyon pou n jwenn yon jij pou ranplase moun n ke n te voye ale an. 

Men se pa sèlman moun ki eli nou voye ale. Ke se moun n ki eli, ke mounn ki nome, nou voye yo ale tou. Men sa ki enteresan nan kesyon an, nou voye ale anpil Premye minis ak Chèf polis, aprè sa nou retounen ak yo ankò nan menm plas lan. Pou ki sa ke n te voye yo ale, mande m ankò? An verite, mwen pa vrèman gen repons.