Lèt tou Louvri pou: Popilasyon Nòdès, Komite Kanal la, Popilasyon ak Peyizan Maribarou ak Wanament, Òganizasyon peyizan k ap travay latè, Tout Ayisyen konsène

Nou, nan Kout Lanbi Rasanbleman pou Liberasyon Ayiti, KLARALA, ap salye Pèp Nòdès la, Komite Kanal la, moun Maribarou, moun Wanament ak respè . Se ak anpil rekonesans n ap di chapo ba e konpliman pou kouraj ak detèminasyon tout sa ki te travay san pran souf, e kanpe djanm anfas pwoblèm tout kalite, anfas vwazen ak moun tout plimay ki te mete ankwa pou kanal la pa t fèt. Batay pou met kanal la kanpe te voye gwo chòk elektrik nan venn Ayisyen toupatou, yo te pran fètekòz e yo te di: nou pa p ret kanpe gade, batay sa a se batay panou tou: Kanal la Pa p Kanpe. Koze kanal sa te rive kreye yon gwo solidarite nan mitan Ayisyen. Yon van fyète t ap soufle sou tout Ayisyen ki te bouke pran souflèt imilyasyon kote yo pase. Lespwa t ap boujonnen. Anpil men kontre te fèt pou ranmase lajan voye bay reskonsab kanal yo. Pa t gen ni twò gwo ni twò piti; tout moun bay sa yo kapab, epi n ap pouse. Se konmsi te gen yon lòt solèy k ap leve, diskou a te chanje, tout moun te sèmante 77 fwa 7 fwa, vwayaj sa, nou p ap pèdi batay la, paske pèp ki konn fòs yo e ki fè tèt kole pa gen dwa pèdi batay. Yo pa bezwen konnen si w adwat, si w agòch, si w wouj, si w nwa, si w pale angle, panyòl, ayisyen oswa franse: sèl sa yo konnen: Kanal la p ap Kanpe. Epi y ap pike devan pou bati 3 lòt, 6 lòt, 10 lòt kanal konsa, jiskaske peyi a vin vèt tankou powo, jiskaske yo kapab manje vant plen, 3 fwa pa jou, san kè sote pou pwèzon vwazen pa pete fyèl yo.

Se sa pwojè a te ye pa gen twò lontan, e se dèyè michan pwojè sa a Ayisyen te kanpe, paske se te pou benefis tout peyi a. Si nou byen sonje, konstriksyon Kanal Plèn Maribarou kòmanse pandan pèp Ayisyen t ap travèse yonn nan pi move epòk nan istwa l. Grangou t ap touye peyizan nan zòn nan, pandan otorite lokal yo t ap konfiske tè yo pou separe ak etranje. Vant pèp la te nan men vwazen ki t ap voye vann tout kalite pouriti andan peyi a. Se konsa pi fò moun nan zòn nan te pèdi lèspwa. Anpil nan yo te tonbe nan mizè e te tounen mandyan, pandan yon ti ponyen t ap byen mennen.

Alapapòt, lè peyizan te kòmanse travay ak fòs ponyèt yo, gouvènman apatrid Aryèl Anri a te pran pozisyon pou leta dominiken kont aspirasyon lejitim popilasyon Nòdès la. Peyizan yo te kontinye fouye e yo te vin jwenn gwo ranfò nan men kominote Wanament la. Yon kanpay te deklanche tout kote gen Ayisyen pou pote lamenfòt pou Kanal la pat kanpe. Dyaspora a te leve kanpe anblòk. Nou konnen tou sa ki pase apresa. Nou konnen kisa ki pou t a kontinye fèt, pou konsolide travay kanal la epi vanse pi douvan. Poutan, se ak gwo kè sote nou wè se pa sa k ap fèt. Kounye a se chirepit, se divizyon.