Mouvman politik JENERASYON WOZO denonse e kondane kanpay denigreman, rasyalis, zenofòb e diskriminatwa kap fèt nan peyi Etazini kont konpatriyòt nou yo

Nan peryòd elektoral minorite e kominote ki pi vilnerab yo toujou tounen zouti pwopagann elektoralis anba bouch gwoup ki dominan yo. Objektif kanpay ak pwopagann rasis sa a ke Pati Repibliken an òkestre, an patikilye Kolistye Prez. Donald J. Trump lan, James David Vance ak Elon Musk, yon figi enpotan, fèt e planifye pou mobilize emosyon ak pilsyon ki pi ba lakay patizan yo sou kouvè denonsyasyon imigrasyon illegal.

JENERASYON WOZO ap raple ke non selman kanpay sa yo zenofòb e rasis men tou, li mete yon sib nan do chak konpatriyòt Ayisyen kap viv nan peyi Etazini, yon kote kigen anpil defayans sou kontwòl zam afe kap sikile.

JENERASYON WOZO denonse tou silans ak pasivite « Otorite » nan Peyi d Ayiti ki pa bay Ayisyen regle anyen pou yo ni sa ki la ni sa ki lòtbò dlo.