Fòk yo trake bandi ak kravat yo !

Pesonn moun pa dwe pran plezi, pa dwe ri malè yon lòt moun. Se prensip lavi a menm sa ye. Men, tankou nou tout konnen l, genyen sitiyasyon yon moun ap benyen, nenpòt  jan w vire koze a, nenpòt fason w analize l, ou pa bezwen gen kè kase pou w admèt sitiyasyon an se moun nan ki plonje tèt li ladan l ak tout konsyans li.

Ki esplikasyon ekip k ap defann atoufè ak kòl blan yo/bandi ak kravat yo/dechèpiyè Leta yo ap bay popilasyon an pou fè l konprann se enjistis, se pèsekisyon politik, se asasina karaktè, yon pakèt gwo ekspresyon pou pou kraponnen nou, y ap fè tout moun ki sou lis plizyè peyi etranje kòm otorite ki anflajele peyi a, anflajele Leta. 

Se pou defansè kòz enposib sa yo vini ak atik Konstitisyon an ou lwa peyi a ki bay yon moun dwa depi w anndan Leta ou byen ou genyen enfliyans nan Leta ou kapab detripe l, ou kapab wete tout chè sou li nan detounen resous li ta dwe dispoze pou bay sitwayèn ak sitwayen yo sèvis tankou: sante, edikasyon, manje, konstwi enfrastrikti, lwazi sen pou pèmèt nou viv tankou moun dwe viv.

Ti mizik anba anba k ap soti tanzantan pou fè konnen entèl pa ladan l, se paske yo «envieux sort» l ki fè y ap klewonnen non l kòm dechèpiyè, genyen yon kesyon moun sa ta ka poze tèt li: se paske Ayiti se yon peyi san  sanksyon moral se sa ki pèmèt l ap louvri gagann li, ou byen pran plim li pou vin defann yon dechèpiyè/yon bandi ak kòl blan/yon bandi ak kravat.

Se pou defansè kòz enposib yo di popilasyon an ki diferans li wè ki genyen ant bandi ak sapat yo k ap fè tout krim nou konnen yo ak bandi ki fin dechalbore kès Leta ki fè Ayiti ak tout pitit li yo tounen peny tidan tèlman nou sal, tèlman nou lèd, tèlman nou gen kras. 

Ayiti ansanm ak tout pitit li yo, nou pa vle etikèt sa yo, nou pa vle repitasyon sa yo. Zansèt nou yo pat fè 1804 pou sa. Moun nou swiv yo pat mache goumen pou rache lòt pèp nan lesklavaj pou sa.  Se pou sa nou dakò nètalkole ak tout mezi k ap pran pou mete «hors d’état de nuire» tout atoufè, tout dechèpiyè, tout bandi ak kravat ki te toujou ap fè zewo(0) tounen nèf(9) sou baz yo entèlijaaaaan.

Kounye a se pou Lajistis peyi nou pran responsablite l. Se tout enstans nan Leta ki gen responsablite mennen ankèt pou dekouvri dwèt long siperyè yo kontinye fè travay yo san presyon, san moun pa. Se pou lajistis li menm tou akonpaye enstans kontwòl yo nan rapousib bandi ak kravat yo tout kote yo ye.

Se jistis pou peyi a. Se jistis pou pèp Ayisyen an.

Se lave lonè ak repitasyon pèp Ayisyen an.  Se leve memwa tout moun ki mouri yo, sitou sila yo ki pat gen non, nan batay yo t ap mennen pou Ayiti te kapab chanje figi, pou Ayisyen te kapab jwenn lavi miyò ak byenèt.

Batay la se chavire tab la tout bon pou akouche lòt Ayiti a. Anyen pa enposib pou moun. Se volonte ak detèminasyon nou bezwen. Tou 2 valè sa yo nan ADN nou pèp Ayisyen.

Marcel Poinsard Mondésir 

12/12/2023.-