An n bay Ayiti yon kout men pou l kapab gen yon demen

Sa fè lontan batri Ayiti dechaje. E se sa k fè ke l pa kapab demare. Pou Ayiti kpab gen yon demen, li bezwen yon gwo kout men de tout pitit li yo.

Sa fè lontan Ayiti nan garaj yon bann ak yon pakèt mekanisyen abolocho, machoukèt k ap eseye manyen, touche tout pyès ki nan machin lan pou fè l pati. Malerezman, yo pa konnen sa yo ap fè, donk machin lan pa k ab bouje.

Chak jou ki pase, po machin lan ap dekale. Ki vle di, li ap pèdi tout frechè, tout bèl koulè ke l te genyen. San konte pyès ki ap wouye. Donk, machin lan ap devalorise.

Pandan tan sa, ou tande, stat, bal gaz, pouse, an n eseye demare, se toujou pawòl tout mekanisyen k ap travay nan garaj lan. Men, pandan tout pale fò sa yo, bòs ki an chaj garaj lan poko jan m ka wè ke se batri machin ki rele Ayiti an ki dechaje. 

Se batri Ayiti ki bezwen rechaje. E pou Ayiti kpaab gen yon demen pou ti moun ki ap vini yo, li bezwen yon gwo kout men de tout granmoun  jodi yo.

Gen anpil ayisyen andedan tankou andeyò peyi an ki gen kab nan men yo ap tann pou yo bay Ayiti boustè pou rechaje batri l. Sa w tande an, aprè yon ti tan, voum, kavoum, yon sèl kout kle, Ayiti t ap demare.

Tou pil ayisyen sa yo se ekspè yo ye nan zafè motè, transmisyon, radyatè, estatè ak tout lòt bagay ki nan yon machin ki rele Ayiti an

Se ki vle di: Depi machin lan fin  demare, youn ladan yo ap pran volan an, epi li ap konnen sa pou l fè pou fè machin  lan pran bon direksyon ki ap mennen l nan chemen estabilite ak devlopman.

Li ap konnen gen pasajè nan machin lan ki pa kpab pran move sekous, donk nan sans sa, li ap fè tout efò pou l evite tout obstak ak tout move wout pou l k ab pa lague machinn lan nan pil gwo twou ki gen nan la ri an.

Depi anba tant nan Palè nasyonal, chofè an ansanm ak tout ekip teknisyen li yo ap gen pou sonnen kòn lanbi rasanbleman an pou mobilize ayisyen nan tout kò peyi an tankou nan Nò, Sid, Lès ak Lwès etsetera.

Konsa, sa yo ki an Ewòp, Amerik, Lafrik, tout kote nan rès mond lan ap gen anvi retounen vin pote kole nan konbit gwo rasanbleman pou devlopman sa.

Wi, pou Ayiti kapab gen yon demen pou timoun ki ap vini yo, li bezwen yon gwo kout men patriyotik pou rechaje batri l ki pa gen chaj. Ki se yon chaj de motivasyon. Yon chaj de konsyans.

Sonnen lanbi rasanblreman an, youn di lòt, pandan bandi yo ak volè yo ap gen pou fè wout Penitansye nasyonal pou yo peye pou kri m vòl, vyòl ke yo te fè, men nan men, an n bay Ayiti yon kout men pou l kapab gen yon demen. 

Kò m koze an di: men anpil chay pa lou. Donk, nan respè youn pou lòt, pou yon demen miyò pou timoun ki ap grandi yo, Ayiti ap bezwen tou, yon bon kout men de bon zanmi ke li genyen nan entènasyonal lan.

Pwofesè Esau Jean-Baptiste