Yon fanm nan Bwodken k ap gade kouman entelijans atifisyèl la ap chanje lavi l

Yon diaspora nan peyi Dayiti

Nan Bwodken, twazyèm seksyon kominal Aken, yo rele m Youyou oswa Ti Da. Non yo chanje men lavi nou sanble. Van an vante menm jan pou tout moun, tout moun jwenn menm kout gouyad la. Sa ki fè nou sanble a pi enpòtan pase sa ki fè diferans lan nan mitan nou. Pa bò isit se aksyon yo ki enpòtan, se yo ki genyen sans.

Sa nou aprann depi lè nou te ti katkat, sa nou toujou ap repete jounen jodiya, se ak yo nou mare senti nou pou nou kapab kenbe djougan. Pou m soti Aken pou m al lakay mwen nan Bwodken mwen pase nan wout tè a, apre 2 kilomèt li tounen on ti chimen nan mòn nan. Sa ki rele kouran nou poko janm wè sa, pou m byen di w menm yon kout pawòl tafya yo poko rache ba nou  santi. Ou wè kote sa a, tan an pa ni dat ni lè, tan an se sezon lapli, sezon sechrès, lè nou resi tande sa pale de sa k ap pase yon lòt kote se toujou lè yo pase mòd, kòmsi bagay sa ki rele nouvèl pa sanble n.