Stephanie Larrieux, yon fanm ki o sèvis kominote ayisyen an nan depatman Zile Frans lan

Mètrès Stephanie Larrieux, se yon moun ki pote relijyon popilè ayisyen an nan nanm li. Li pa janm rate yon okazyon pou montre bèlte ak dimansyon espirityèl vodou a ki chita sou lanmou youn pou lòt ak lanati a anpi pataj. Se pou sa, li kreye yon Magazin ki pote non Nèg Aleman kote misyon l se demistifye vodou a, fè pwomosyon keseswa sou rezo soyo yo ak divès aktivite kiltirèl li fè nan kominote ayisyen an nan peyi Lafrans. Pou Manzè Larrieux : «  Pale vodou se pale idantite ayisyen an. Se kominye ak nanm pèp ayisyen an. Se nan lide sa a mwen kreye platfòm sa a ki kapab sèvi pon ant vodouyizan ki Ayiti ak sa ki nan dyaspora yo ».

Fòk nou di tou, keseswa se Wa vodou a Augustin St Clou, Ewòl Josué, Manbo Euvonie ki fenk travèse, yo toujou retire chapo pou travay Stephanie Larrieux ap fè pou vodou a nan kominote Lafrans lan. Dayè sa pa gen lontan, depi limenm ak kèk lòt vodouyizan te chante Bohoun pou Manbo Euvonie ki ale nan ginen. Youn nan pwojè li vle mete sou pye, se pèmèt lè yon vodouyizan ki Lafrans mouri se pa legliz pou yo ale chante antèman li men pou vodouyizan yo kapab reyini yo pou yo fè sa kòmsadwa nan lojik vèdilèn vodou a. Pou Erol Josué : « Mètrès Stephanie Larrieux se gadyenbi  jenerasyon vodou a pou moman konyeya».

Jan n te di l pi wo a, Mètrès Stephanie Larrieux se fanm ki gen plizyè chapo. Yon lòt chapo li genyen, se militan politik la, kote li se reprezantan pati politik Pitit Desalin nan Lafrans. « Entegrasyon m nan pati politik Pitit Desalin, se  pa yon aza. Se yon konstriksyon ideyolojik. Paske depi m piti, paran m te toujou ap fè eksperyans politik devan je m. Anpi fanmiy lan te toujou gen yon sansibilite pou ideyoloji moun goch yo », pou n site li.