Pou zanmi
ki pandye
nan lantouray kè sere.
E se konsa
Gen kanno ki tire
Gen machwè ki babye
Gen kè ki tou rete debwaye
nan mitan sezon an.
Gen sezon konsa menm.
Detanzantan
gen yon kalte moun ki pati
sanzatann
san tèt yo pa pati.
Toudebou
Gen yon kalte flè ki seche
san bri san van san kont.
Se sezon an menm.
Gen dlo ki pote pafen yo
nan rèl do yo
jis yo bout sou do
san pèsonn
pa gentan di way.
Se yon move tan
ki bare nou nan wout
Jis n ap degrennen
men nan men
ti kal pa ti kal.
Se sezon an menm.
Gen kanno ki tire.
Nou tout pèdi
Grenn kè
Grenn soulye
Grenn tèt
Grenn pawòl
Grenn fòs
pou n ta rele.
Sèl grenn rèv nou
Ki rete pann
Konsa !
Rodolphe Mathurin
15 - 01-2025
