Minis Octavius onore 6 anplwaye fanm pou kontribisyon yo nan avansman ministè Jenès, Espò ak Aksyon sivik !

Nan yon seremoni ki te òganize nan katye jeneral MJSAC la (Ministè Jenès, Espò ak asyon Sivik), Minis Niola Lynn S. D. Octavius te onore sis (6) anplwaye feminen pou travay di ak devouman yo nan ministè a. Evènman an te yon opòtinite pou rekonesans kontribisyon enpòtans fanm yo nan avansman enstitisyon an, epi li te fèt nan kad kontinyasyon Jounen entènasyonal dwa fanm yo, ki te selebre 8 mas la. 

Minis Octavius te eksprime fyète l pou kontribisyon chak fanm nan devlopman ministè a. Li te remèt yo yon plak onè ak merit, pou rekonesans travay yo ak angajman yo.

" Se yon gwo onè pou mwen ka onore fanm sa yo ki montre yon sans responsablite ak devouman nan travay yo. Yo se yon egzanp pou tout anplwaye ministè a ", te deklare minis la. 

Sis (6) anplwaye yo, ki reprezante plizyè direksyon ak sèvis nan ministè a, te eksprime rekonesans yo pou onè sa a. Yo te mete aksan pou di byen fò ke se premye fwa yo resevwa yon rekonesans ofisyèl konsa nan karyè yo, depi plis pase 30 ane pou kèk nan yo. 

8 mas la, minis Octavius te òganize yon jounen fratènite ak solidarite pou tout fanm kap travay nan ministè a. Evènman sa a te yon opòtinite pou yo reflechi sou enpòtans fanm yo nan devlòpman sosyal ak ekonomik, epi pou yo selebre reyalizasyon yo. Onè 18 mas la te yon kontinyasyon nan mesaj solidarite ak rekonesans sa a. 

Pandan seremoni a, minis Octavius te resevwa tou yon plak rekonesans nan men Inyon Inityativ Popilè pou Ankadreman Lajenès (UNIPEP) kap evolye nan katye Sat, komin Site Solèy. Òganizasyon an te remèsye minis la pou soutyen san relach li bay òganizasyon jenès nan katye popilè yo. Minis la, ki pat atann onè sa a, te eksprime gratitid li epi li te reyafime angajman li pou kontinye travay pou lajènès ak kominote yo. 

Men lis anplwaye feminen ki te onore yo pandan seremonii a : 

- Jeanne Lola Jn C. Magloire– Kòdonatris Biwo Minis la 

- Lyne Delva Jacques– Direktris Adjwent Resous Zimènn 

- Marie Ange Lorméus – Kòdonatris Adjwent Pak Espòtif 

- Nirva Chéry Lapommeray – Chaje misyon nan Direksyon Jeneral 

- Jesula Joseph – Menajè 

- Yvrose Pierre Augustin – Menajè 

Seremoni an te fèt anprezans Jean Claude Douyon, direktè resous zimènn ministè a, ki te felisite tout patisipan yo pou angajman yo. 

Evènman sa a se yon prèv ke devouman ak travay di pa janm pase inapèsi. Ministè a, anba lidèchip Minis Octavius, kontinye montre valè li bay anplwaye li yo, sitou fanm yo, ki jwe yon wòl enpòtan nan devlòpman enstitisyon an. 

Gérald Bordes