Minis Octavius sansibilize fanm MJSAC yo sou dwa yo ak wòl yo nan moman Kriz la

Nan kad Jounen entènasyonal dwa fanm yo, Minis Niola Lynn S. D. Octavius, kap dirije ministè Jenès, Espò ak Aksyon Sivik (MJSAC), te òganize yon jounen sansibilizasyon pou anplwaye fanm ministè a. Aktivite sa te fèt vandredi 7 mas la nan lokal ministè a, sou lidèchip Minis Octavius, ki pafwa rele "Minis kota 30% fanm", ak yon vizyon klè pou mete aksan sou lidèchip feminen, egalite chans, ak pwogrès fanm nan sosyete a.

Nan diskou li, Minis Octavius te raple enpòtans istorik dat 8 mas la, yon dat ki make lide pou defann dwa fanm ak rekonèt kontribisyon yo nan sosyete a. Li te reyafime angajman li ak gouvènman an pou asire ke fanm ayisyèn lan okipe yon plas enpòtan nan tout nivo gouvènans ak devlopman peyi a. Minis la te mete aksan sou lefèt ke fanm reprezante 52% popilasyon ayisyèn an, kidonk relans enstitisyonèl ak devlopman peyi a pa ka reyalize san yo.

Atravè aktivite sa a, Minis Octavius te montre angajman li pou pwomouvwa lidèchip feminen epi akonpanye fanm yo nan moman difisil peyi a ap travèse. Li te eksprime konviksyon li ke fanm yo dwe patisipe aktivman nan pran desizyon ak nan tout efò pou rebati peyi a.