Premye epizòd yon fim sou Jezi soti an me 2024

Apati mwa me 2024 la, gen yon bèl fim ki rakonte lavi ak ansèyman Jezi ki soti. Se sèlman moun ki ofri tèt yo volontèman ki te travay nan bèl pwojè sa a.

Fim sa rele: “Lavi Jezi ak travay predikasyon l sou tè a.” Li gen 18 epizòd k ap pèmèt nou byen konprann lavi ak travay predikasyon Jezi, e y ap ede n pi byen konnen pèsonaj sa a ak fason li te konn boule ak lòt moun. Anpil moun ap anvi gade premye epizòd fim sa a nan kongrè rejyonal Temwen Jewova yo pou ane 2024 la ki gen tèm: "Anonse bon nouvèl la!" Lòt epizòd yo ap disponib nan kongrè k ap fèt ane k ap vin apre yo.

Temwen Jewova yo suiv egzanp Jezi antanke kretyen e y ap preche nan anviwon 240 peyi ak tèritwa pou yo fè konn sa Bib la anseye gratis. Yo se youn nan pi gwo òganizasyon ki dakò travay san yo pa peye yo pou yo fè piblikasyon ak fim ki baze sou Bib la.

Men sa Fred Aimé, pòtpawòl nasyonal Temwen Jewova yo di ak kè kontan: “Apre tout ane sa yo nou fin pase pou nou prepare epi mete sou pye konstriksyon ki gen rapò ak pwojè a, finalman yon pati nan fim sa a disponib pou moun yo. Nou sèten li pral touche kè plizyè milye moun, plis pase nenpòt lòt fim ki egziste jodi a ki pale sou lavi Jezi.”

Yo te kòmanse anrejistre fim sa a nan biwo Temwen Jewova yo nan peyi Ostrali nan mwa me 2022. Te gen plis pase 500 volontè ki te travay nan kèk espas ki mezire antou anviwon 7 000 mèt kare, e sa te pèmèt moun yo jwe sèn yo jan yo te pase nan Bib la. Tèm premye epizòd la se: “Vrè limyè monn nan.” Li gen de pati, y ap pase yo vandredi ak samdi nan kongrè rejyonal k ap dire twa jou a ki gen tèm: “Anonse bon nouvèl la!” Gen yon apèsi sou dram sa a ki disponib sou jw.org, sit Entènèt ofisyèl Temwen Jewova yo.

Men sa Fred Aimé ajoute: “Nenpòt moun ki konnen sa tout pwofèt yo te anonse sou Jezi, oubyen ki anvi konn plis, ap pran plezi gade fim “Lavi Jezi ak travay predikasyon l sou tè a”. Nou envite tout moun vin gade premye epizòd fim sa a nan kongrè n ap òganize a!”

Reyinyon Temwen Jewova yo, kongrè ak asanble yo, piblikasyon ak videyo ki baze sou Bib la, gratis e yo disponib pou tout moun. Pa gen lakòlèt. Pou w ka asiste yon kongrè oswa yon reyinyon ki pi pre w, ale sou sit Entènèt Temwen Jewova yo, jw.org. Ale nan seksyon "Enfòmasyon sou nou" pou w ka gade yon apèsi sou premye epizòd "Lavi Jezi ak travay predikasyon l sou tè a".

Lesly Gaussaint

Biwo Relasyon Piblik

Syèj nasyonal Temwen Jewova yo