Accueil » Société » Sou wout yon ministè

Sou wout yon ministè

19 mars 2017, 9:33 catégorie: Société6 084 vue(s) A+ / A-

Nan plede mache chache wè zanmi pou solitid pa touye w, anpil fwa yon ti koze tou piti ka tounen yon dram. pi bon jou pou sa rive w, se vandredi apre yon semèn travay, gen yon bèl abitid pran yon ti tan pou w poze nan yon baz ak lòt zanmi pou bwè yon kou epi pale tout sa n kapab.

Kòm nou pa janm prepare diskisyon yo, se aktyalite a ki enpoze fon deba yo. Natirèlman, tout zanmi yo debake youn apre lòt avèk yon koze lari a. Se sa nou renmen. Se sa nou bezwen. Lari a ta dwe lakay nou, men nou tèlman evite l tan sa yo, se nouvèl pou yo pote ban nou. Lari a sinik gen de lè. Se sa yo di. Se sa nou kwè. Antouka, nan melanje anvi ak nostalji, nou vin tounen yon ekip moun tris k ap bay moun nou pa menm konnen madichon.

Jodi a, pa gen youn nan nou ki anvi pale sou lari a. Palman monopolize pawòl la nèt. Depi de semenn, gen gwo negosyasyon pou jwenn yon premye minis. Tout je brake sou menm batiman an, tout zòrèy branche sou menm frekans la. Palmantè yo ap mennen. Palmantè ap fè aktyalite. Palmantè ap depoze. Chak zanmi gen yon remak, chak zanmi gen yon boul tristès l ap trennen.

Semèn sa yo se pwopozisyon lwa sou difamasyon, rezolisyon sou depòtasyon-transfè-ekstradisyon Guy Philippe, emay jis nan krèk koko sipèsta prive yon senatè ki konstwi tèt li kòm champyon moral peyi a.

 Nan rakonte, verite apre zen, gen youn nan zanmi yo ki pa janm vle pran pye nan diskisyon an. Li pa menm eseye. Yon sèten moman, nou rann nou kont se sèl zanmi a ki pa ri. Nou oblije mande l ki pwoblèm li genyen. Sezisman ! se pa yon pwoblèm sèlman. Se plis yon dram.

 Zanmi an t al lekòl aletranje tou. Li tounen nan move moman ak gwo rèv rebati lavi l nan peyi a. Annatandan, madan m li rete deyò ak de pitit li rete lotbò a. Sa vle di fòk zanmi an fè transfè pandan lajan ameriken ap monte. Se pa dyòb li pa genyen, men kòb la pase pou de kay. Pou de lavi. Youn isit youn lotbò dlo.

Depi yon mwa, li gen yon zanmi ki pwomèt yon dyòb chèf kabinè, lè l rive minis. Nan yon premye tan, zanmi a kòmanse bay konsiltatsyon, ekri dokiman, monte ekip. Kandida minis la ba l garanti prezidan repiblik la gen tan chwazi l. Se pa sèlman yon non k ap sikile, se pito yon pwomès fèm. Men lè chèf kabinè presanti a wè kabinè a desann san minis li a, li kòmanse deprime lè l oblije fè envantè tout sa li oblije fè pou ede minis presanti a rive jwenn pòs la.

 Pou w rive minis nan peyi a, apre benediksyon prezidan an, ou dwe konvenk zanmi prezidan yo. Sof, chak jou zanmi prezidan yo chanje. Pirèd, ekip moun sa yo chanje nimewo chak trannsizèd tan. Si ou ka fè blakawout sou yon pati politik, ou pa ka bliye diskite ak palmantè. Men pwoblèm nan ! Li pa enposib pou yon palmantè pou kont li gen fòs yon pati. Antouka, pa gen gouvènman ki ka monte si palmantè enfliyan yo pa di mo pa yo.

Zanmi an, podyab, trennen devan palmantè, li suiv minis la nan sèt lòj, nan katòz reyinyon priyè, nan venteyen badji.

 Apre preske san mil dola depanse, jou maten Pòtoprens bloke a pou bis gouvènman an desann nan Sena a. Non minis la pa desann ! Yo rele sa byen konte mal kalkile.

Jean-Euphèle Milcé

Comments

comments

scroll to top