S'identifier Contact Avis
 
26° C
  à Port-au-Prince
Radio Pacific 101.5 fm - En direct
Le Journal Dernière heure Actualité Édito Tribune Société Économie Culture Diaspora Sport rpacific101.5 FM  
× Immobilier Appartements Maisons Locaux commercial Locaux pour Bureau Terrains Véhicules Voitures Camions Tout Terrains Minibus Motos Divers Animaux Articles ménagers Ordinateurs et pièces Équipement électronique Équipement industriel Équipement lourd Diverses études Légal Bijoux et montres Smartphone et tablettes Vêtements Jeux video
Tolerans n ap chèche !

Tolerans n ap chèche !








Lontan se te anba chal. Koulye a se pou tout bon. Ayisyen kòmanse gade zòt nan je pou l ekspoze idantite kiltirèl li.

Apre yon tan se yon lòt. Se pa ti vyolans, anpil ladan yo byen dokimante, ki fèt sou vodouyizan nan peyi Dayiti. Se vre kanpay rejte, ki se zèv kretyen melanje ak pouvwa politik ak zentelektyèl ipokrit, travèse listwa peyi nou an. Men si nou chita ap pale sèlman sou sa, se tankou nou jwenn ekskiz pou tout lòt yo ki pase vi yo ap zongle vodou. Jan yo kabap. Lè yo kapab.

Jis koulye a, kamarad mwen yo, lè n te timoun lekòl, ap rakonte sa ki te rive yon pè Kanadyen ki te gen gwo konviksyon se vodou ki fè ti Ayisyen sòt konsa. Kòm konsekans, peyi a p ap janm ni pwospere ni anpè. Kòm se te yon obsesyon lakay li, chak fwa nou mete nou an kontravansyon ak disiplin lekòl la, nou eksplike pè se lwa ki fè nou sa. Podyab egare a! Kòm li pa t gen mwayen pou l verifye, li oblije kwè nou. Pandan l bougonnen epi veye zo l pou yo pa pran zonbi l.

Lekòl, Leta, lasoyete, lafanmi, tout kò nan peyi a te gen dizon pou fè nou rayi vodou. Natirèlman, nou tonbe nan pyèj la. Nou vin asosye fènwa, lanmò, peyizan ak vodou. Sa vle di, tout moun ki pran chans monte drapo yo, jete twa degout dlo anvan yo bwè, pote yon rad gwo ble penitans, flannen ak bag lwa se malfektè. Antouka si se pa t mizik, zèv atistik, literati anpil nan nou pa t ap janm pwoche relijyon sa a. Poutan, chaje sit pelerinay, lakou, peristil pèp la ap vizite an kachèt.

Rapò vodou ak politik se yon sekrè nou gade mal. Li senp. Anpil chèf renmen al pran beny, al bouske lachans. Pou vegle je pèp la.

Nou abitye ak koze sa yo.

Men gen moman nan listwa peyi n kote gen gwoup moun ki pale pawòl yo vle. Pawòl yo kapab. Apre tranblemandetè demildis la, gen yon ekip atoufè ki fin anranje dè vodouyizan. Ak gwo kout alelouya, eskwad kretyen tonbe menase vodouyizan paske se yo ki rale malediksyon sou peyi a. poutan, pratike yon relijyon se yon dwa grandèt tout Ayisyen genyen. Apre kèk insidan izole, inisyativ la pa t fè resèt. Erezman. Tan chanje, farin nan pa vin nan menm sak ankò.

Festival entasyonal vodou ki sot fèt nan vil Gonayiv la se yon viktwa nan sans sa. Nou retni atitid toleran lòt relijyon ki pratike an Ayiti yo kenbe fas ak aktivite sa a. Yon gwo wonble fèt devan katedral Gonayiv. Monseyè Robè dwe jigote nan tonm li. Moun Latibonit konn listwa sa byen. Lè monseyè Wobè te vivan, li te konn al toke kòn li ak vodouyizan. Kèk fwa se ak fòs lapriyè. Anpil fwa se ak konkou jandam pou kwape bòkò, kraze badji. Demildiznèf pa milnèfsankarant. Seremoni vin fèt devan legliz. Lamès chante anfas seremoni an. Tout moun kontan.

Sof pastè Anèl kite anonse li pral desonnen lwa yo, bloke seremoni an. Paske se li ki anbasadè Bondye nan peyi a. Nad marinad. Siman Bondye te gen tan di l vouyizan yo se pitit li tou.

Peyi a gen lè pi bon lè tout moun gen men dwa, mensi yo pa gen men relijyon. An pasan, mòd festival sa yo rann dinyite nou yon pakèt sèvis.

Jean-Euphèle Milcé



Articles connexes


Afficher plus [3429]