Accueil » Société » Kandida pou minis pi ra pase bato gaz sou tan anbago

Kandida pou minis pi ra pase bato gaz sou tan anbago

07 février 2018, 9:35 catégorie: Société23 728 vue(s) A+ / A-

Chak fwa gen yon gouvènman k ap monte, si yon moun gen eksperyans lavi an Ayiti, se moman li pran ti chèz ba l pou l ap gade, tande nouvèl, fè kòmantè.

Peyi nou an gen yon kategori moun ki rele demachè antrav. Yo toujou la, y ap veye kou, y ap chèche okazyon pou foure tèt yo nan yon koridò ki kondui tou dwat nan pouvwa. Demachè antrav sa yo, pa jan m pa gen, nan period gouvènman ap monte, yon dènye grenn anba men yo. Yon fanm, yon nèg konpetan, militan, ki sèvi byen epi ki pa konn bliye zanmi ak baz li.

Chak demachè antrav gen yon minis nan valiz yo. Premye travay yo, se mache fè lobing, nan palman, nan baz popilè, nan katye jeneral pati politik, nan laprès, dèyè kontwa sektè prive, pou yo vann yon moun. Natirèlman, chak moun yo rankontre, diskou a pran yon lòt fòm.

Lè defen Preval t ap fè premye manda l kòm prezidan, vin gen yon kriz ki paralize pouvwa a. Premye minis la demisyone epi Larepiblik ap tann sa k ap tonbe. Li te sanble prezidan an pa t prese. Koze a te vin sanble ak yon jwèt pandan koutye politik yo ak demachè antrav yo ap tann. Epòk sa a zafè rezo enfòmasyon yo sou entènèt pot ko alamòd. Te gen yon maji ki antoure lis k ap sikile yo. Fòk ou te gen bon bwa dè bannann ou pou ou rive konn non ki nan lis yo. Sa k te pi bèl la, peryòd chanjman gouvènman toujou vin ak jantiyès, bon konprann pou yon pakèt moun. Menm si se te yon opozan gwo ponyèt, chaje ak konviksyon revolisyonè, li posib pou li bay yon ti kalmi, kase tout ajitasyon li te konn fè. Nòmal, peryòd sa a tankou fèt nwèl pou politisyen. Tout moun gen dwa reve, tout moun gen dwa espere, tout moun gen dwa fè pwojè ak kado y ap tann.

Pa t gen Facebook. Pa t gen posiblite pou lis sikile tout boulin. Tout moun te konnen defen prezidan Preval te pase yon pakèt tan ap chèche yon premye minis nan tout ti twou kachkach Larepiblik.

Nou te panse pwoblèm sa te regle. Yè swa, prezidan peyi a fè pèp la yon gwo konfidans : li konplike pou jwenn yon minis. Nou vin rann nou kont se yon dyòb ki tèlman konplike, li ka fè moun pè. Men, nou ka konprannn a ki pwen, gen anpil resous ki ekspire lakòz koze dechay palman an yo pa genyen. Nou ka konprann posiblite rann zanmi yo sèvis pa menm depi lè OMRH dwe ba y dizon l nan rekritman ministè yo. Epi, gen kesyon siren nan gouvènman an trete yon fason pou l kraze sou chèlbè kòtèj yon minis. Nou ka parye, gen kèk ofisyèl ki pa imajine lavi chef yo san sa.

Nou pale ak de twa demachè antrav. Yo konvenk nou prezidan an pa chèche vre. Chak palmantè, chak gwoupman politik, chak sipòtè pouvwa gen yon grenn minis nan valiz yo. Nou pa konn si yo bon, men yo la. Y ap chofe. Epi pèp la ap tann ki fanmi, ki vwazen k ap soti nan tiraj la. Moun yo pa fou lè yo kwè kontak yon minis gen plis vale pase yon vwayaj Chili.

Si prezidan an ta fè pase yon avi nan jounal pou l mande moun ki vle minis al depoze CV, nou t ap wè koze. Nan li dosye sèlman, prezidan an t ap gen travay nan men l pou katran klè.

Jean-Euphèle Milcé

Comments

comments

scroll to top